Ado  pun paku atau pun pakis,.tamasuak bangso suku rumpuik, sajak dulu di ranah minang, paku takato jadi sayua, samapai kini musawuah juo.

Malah indak sajo dikampuang awak, lapeh ka jawa ka makasar, ka ambon ka kalimantan, sampai brunai darussalam, populer katupek gulai paku, lontong padang namo nyo sinan.

Nan paliang lamak dicampua jariang, Serak-serakan udang bariang, Asamnyo asam balimbiang, bungo sambuang konconyo bana.Kok nak tau di lamak paku, Cubo diulang ma angeik-i, la masiak mangkonyo sero.

Tapi ado saketek nan ma ibo..

Manuruik Pituah Angku Dotor, Paku indak manganduang gizi, sanasib pulo yo cubadak, manganyang indak bapitamin.

Bialah... Ka ba'a pulo.. Ha..

Nan nyato itulah budaya awak, gulai pusako minang kabau.samanjak alun barabalun,maso lawik sacampak jalo,marapi sagadang talua itiak, paku cubadak ala juo. 

Hidup paku jo cubadak, maju terus pantang mundur..

Kito tinggakan soal pitamin, di tela'ah sipaik-sipaiknyo, kito ambiak ka jadi guru..
Dari pengalaman ilmu paku, ado bana nan ka ditiru...
Yaitu perjuangan manantang hiduik, stragle for live kato sibule. Yakin.. Gigieh.. Percaya diri..tapi jujur..

Itu nan patuik kito contoh..

Cubo ang liek ang pandangi.. Indak sajo di tanah lambuak, ditanah napa inyo hiduik, disalek batu jadi juo..malah indak pun di ate bumi..didahan kayu tumbuah paku, dibatang karambiah bisa subur, sampai ka pucuak-pucuak atok, paku ka tatap hiduik mewah.

Sungguah manjadi pangembara, inggok nyo indak manyeso, makan nyo mancari surang, pantang manggadua urang lain, bak cando limau di bindalu. Mandiri.. Itu nan patuik ka ditiru, suritauladan ka dipakai..

Satantang gigieh jo gagah.. Caliaklah perjuangan nyo, walau dihalang dirintangi, baluka ma hambek paneh, angin pun tak dapek lalu, ulah dek angkua kayu gadang, inyo mampu batahan hiduik, dibawah bayangan kasombongan,

Baru kapatang kanai sabik, pagi cako dilanyau kabau, atau dihimpok kayu mati, sahinggo punah tingga tungguah, bisuak pagi tune tacogok, sapakan la rimbun pulo. Paneh bataun tak mamba'a, di paruik alun ka abih, antah kok urek nan tacabuik,

Tapi.. Salagi rumpun tak binaso, nan paku bapantang mati.

Sadangkan makluk tumbuhan itu ma... Indak baraka, indak baraso, indak pulo punyo nafasu lai gigieh mancari hiduik, manga kalian kok manganggur..ha,

Banyak la contoh ayah liek,

Tagangga diparantauan, tatumbuak usaho galeh, Pondo poro pulang ka kampuang. Pangacuiik… Kok badagang raso tak mungkin, pokok tande kadai la lapeh, cari mato Lokak lain, ba’a kok lari dari porong.

Kandas galeh, lompek ka tukang, ndak lante cubo marantau, sandek juo cubo ma ojek, sa indak indaknyo jadi cingkariak manjawek upah, Pendeknyo usaho. Tidak satu jalan ke ROMA kato rang sinan…

Nan tak usah… kalau ba CV duo jari, ma agen manjua ganja,  manempeh ka tante girang. Adaik malarang undang managa. Bisuak basinggang di narako.

Kok lai baliak ka kampuang, basawah mambukak ladang, pabarak taranak ayam. shukur bana turun ka tani… ko indak…

Sawah tingga, ladang marimbo, hutan kosong, lahan talantar. Inyo nan sungguah dipalantah… Tangah hari dilapau juo. Domino balapiah – lapiah. Gurau yo kinca nan utamo. Sahinggo diluluak tajak balabiah. Dilapiak pinggan tacukuik. Pamaleh….

kanker jo tumor dalam hiduik, nan panyagan,pambarek tangan, pamalu lambek bakisah, pantang cilako urang tuo dulu. bagayuik ka urang tuo, babaliak makan ka pusako. apo lai marengek rengek, pacar den la gadang juo, kawin ka ba'a ko la ayah, itu haram bagi anak minang.

baitupun taradok pelajar, mahasiswa nan pacah mental, pangaluah panjang, patuik baraja dari paku. mantang mantang anak kuliah gengsi bana turun kapasa. namua manjadi kutu rumah. penganggur intelek bahaso tren-nyo. Rumus nan dipakainyo. tujuan sikolah jadi pegawai. cari karajo ilia mudiak. masuak kantua kalua kantua. lamar kian kamari.

sahinggo la tipih tapak sipatu, cabiak sarawa tantang iku.batarimo ka indak juo. tidak ada lowongan atau tunggu saja panggilan, baitu jawab personalia.
mangko dek bosan gilo mananti dek umua la gaek juo. kasudahannyo.. baputui asso, tibo depresi, prustasi, bamanuang panggalak surang. dicarak lai kaleang baygon, babunyia muncuang dalam kamar. cengeng...

mangko dari itu nak..karano anak la SMAnan insyallah, tanago ayah lai kuek juo, talakik manyambuang ka fakultas, kini kini ayah pasankan nyampang kok jadi mahasiswa. sampai tak sampai diwisuda. jan pasang jarek samato jadi pagawai dikantua kantua.karano pitih tiok manggarik, sogok manyogok la biaso atau dek sabab karano lain tidak manabuak cito cito.

mangko bukak lah usaho surang, berwira swasta bahaso kalian. jaan tagoda bana jo pegawai. kok indak dikantua indak ka makan. badasi juo handaknyo. musti sanggup mandiri, berdikari, ingek kato bung karno kesempatan itu bukan ditunggu tapi diciptakan. kalau hanyo hiduiik manunggu. samo awak jo lawah lawah sipaik pasif tu ma namonyo.

sadangkan awak harus agresif, progresif dan dinamis. baitu karaker urang minang, watak pusako dari dahulu. kini kalian mewarisi. adopun pantang diwarisi laku parangai dek binalu. sifaik cilako dibaoknyo.

takalo bamulo inggok manempe dikulik dahan, duduak diujuang ujuang rantiang, elok baso batang limau, urang bataduah dibaok naiak, dijamu dibari makan, tamalam diagia lapiak, dek lamo lambek manompang mulai bapucuak sahalai daun, kian hari batambah rimbun urek manjala jala juo, sampai malilik mangumlampai, akhir kato kasusdahan nyo barantiang badahan rampak, badaun babungo kambang, batang gampa urek mancakam, kalah la nan asa dek nan tibo. jauh kan bana nan bak nantun...